Кыргызстандагы суу ресурстарын эффективдүү пайдалануу жана айыл чарбасын өнүктүрүү багытында кезектеги ири долбоор ишке ашырылууда. Бул жолу өзгөчө көңүл Кадамжай районунун Ак-Турпак айылындагы Бүргөндү массивине бурулду, анын жалпы аянты 12 438 гектарды түзөт.
Учурда массивдин 7200 гектары өздөштүрүлүп, дыйкандарга берилген. Ал эми Бүргөндү каналынын 80+00 пикетинен алынган Дюкердин астындагы 3500 гектар жер толук өздөштүрүлүп, пайдаланылууда. Бүгүнкү күндө Бүргөндү магистралдык каналынын суу алуу сыйымдуулугу 18,8 м³/сек түзөт. Бирок, аймактагы жер кыртышынын шагылдуу жана таштак болушуна байланыштуу сугат сууну нормадан көп талап кылат.
Ошондуктан, калган жаңы жерлерди өздөштүрүү максатында каналдын башынан 100+00 пикетке чейин анын суу өткөрүү мүмкүнчүлүгүн 35 м³/секке чейин жогорулатуу зарылчылыгы жаралууда.
Долбоор ишке ашса, кошумча параллелдүү каналдын курулушу аркылуу төмөнкү жыйынтыктарга жетишилет:
-Ак-Турпак айыл өкмөтүнүн 5250 гектар эгин талаалары сугат суу менен туруктуу камсыз болот;
-Жаңы ачылган Дюкер участогундагы 3500 гектар жерге да суу жетет;
-Молдо-Нияз айыл өкмөтүнүн Кыргыз-Кыштак айылындагы 2100 гектар аянтта сугат суу жеткиликтүүлүгү жогорулайт;
-Мындан сырткары, кошумча 2000 гектар жаңы сугат жер өздөштүрүлөт.
Бул долбоорду ишке ашыруу максатында учурда «Кыргызсуудолбоор» ишканасы тарабынан долбоорлоо иштери жүргүзүлүп жатат. Жалпысынан 49 км узундуктагы жаңы канал куруу каралууда.
