Суу чарба тармагынын инфраструктурасын жакшыртуу боюнча Министрлер Кабинетинин Төрага орун басары — Суу ресурстары, айыл чарба жана кайра иштетүү өнөр жайы министри Бакыт Төрөбаевдин тапшырмасын аткаруу максатында, Баткен районундагы Ак-Турпак насос станциясын модернизациялоо боюнча долбоор ишке ашырылууда.
50 жылдан ашуун убакыт мурда курулган станция мурда төрт айылга ичүүчү суу жеткирип турган. Бирок акыркы жылдары жабдуулардын эскирүүсүнө жана суу түтүктөрүн коргой турган системанын жоктугуна байланыштуу суу берүүлөр жума сайын болгону 2 күн менен чектелип калган.
Жалпы наркы 28,1 млн сом болгон модернизация долбоорунун алкагында төмөнкү негизги иш-чаралар пландалууда:
-КПД 80%га чейин жеткен Grundfos SP160-11 үлгүсүндөгү эки тереңдик насосун орнотуу;
-Жаңы насосторду учурдагы чоюн түтүк тармагына кошуу;
-Гидроударлардын алдын алуу үчүн вантус клапандарын орнотуу;
-Сыйымдуулугу 5000 м³ болгон суу топтоочу жай куруу;
-200 гектар айдоо аянтына тамчылатып сугаруу системасын даярдоо.
Күтүлүп жаткан жыйынтыктар:
Системанын кубаттуулугу 180 м³/сааттан → 320 м³/саатка чейин жогорулайт;
Ичүүчү суу берүү мүмкүнчүлүгү жумасына 4 күнгө чейин көбөйөт;
Электр энергиясын керектөө 63%га кыскаруу күтүлүүдө;
Жылына 1 миллион сомдон ашуун электр үнөмдөө;
Жабдуулардын кызмат өтөө мөөнөтү 10 жылдан ашык;
Системанын ишенимдүүлүгү жана автономдуулугу жогорулайт.
Келечекте бул долбоор кеңейтилет — коңшу аймактарда кошумча 1500 гектардан ашуун жерди туташтыруу мүмкүнчүлүгү бар. Ал эми жакынкы жылдарда Баткен районунда дагы 6га жакын ушундай эле долбоорлорду ишке ашыруу пландалууда.
