Суу ресурстары кызматында башкы жана райондук суу чарба башкармалыктарынын башчыларынын катышуусунда жыйын өттү.

Жыйындын негизги максаты – Кыргыз Республикасынын Президенти Садыр Жапаровдун жана Министрлер Кабинетинин Төрага орун басары – Суу ресурстары, айыл чарба жана кайра иштетүү өнөр жай министри Бакыт Төрөбаевдин суу чарба тутумун бекемдөө жана сугат сезонуна болгон даярдыкты күчөтүү боюнча тапшырмаларынын аткарылышын талкуулоо болду.

Жыйындын алкагында суу чарба башкармалыктарынын жетекчилеринин жарым жылдык отчеттору угулду. Өзгөчө көңүл сугат иштеринин жүрүшүнө, дыйкандардын сугат суу менен камсыздалышына, сууну берүү графиктеринин сакталышына, ирригациялык инфраструктуранын жаңыртылышына жана жаңы технологиялардын киргизилишине бурулду.

Жетекчилик тарабынан аныкталган маселелерди чечүү, тартипти жана жоопкерчиликти жогорулатуу, жергиликтүү бийлик органдары жана дыйкандар менен кызматташууну күчөтүү боюнча конкреттүү тапшырмалар берилди.

Жергиликтүү деңгээлде айкын, ырааттуу жана жоопкерчиликтүү иштөөнүн маанилүүлүгүн баса белгилеп, туруктуу суу менен камсыздоо – өлкөнүн азык-түлүк коопсуздугун камсыздоонун жана климаттын өзгөрүү шартында дыйкандарды колдоонун негизги фактору экенин белгиленди.