Министрлер Кабинетинин Төрагасынын орун басары-Суу ресурстары, айыл чарба жана кайра иштетүү өнөр жайы министри Бакыт Төрөбаев республиканын баардык аймактарын кыдырып, ирригациялык инфраструктураны жакшыртууга тынымсыз аракеттерди көрүп, суу тармагында үлкөн иштерди жүзөгө ашырып жатат.
Кыргызстанда сугат суу маселеси — айыл чарбасынын туруктуу өнүгүшү үчүн негизги факторлордун бири болуп эсептелет. Айрыкча соңку жылдары климаттын өзгөрүшү, жаратылыш кырсыктары жана суу булактарынын тартыштыгы дыйкан-фермерлерди бир топ түйшөлтүп келет. Бул көйгөйдү чечүү максатында өлкө аймагында ирригациялык системаларды оңдоо, жаңыларын куруу жана суу чарбасын модернизациялоо боюнча кеңири көлөмдөгү иштер жүргүзүлүүдө.
Өлкө жетекчилиги тарабынан ирригация тармагына өзгөчө көңүл бурулуп, мамлекеттик деңгээлде ири инвестициялар тартылууда. Жаңы суу каналдары, дамбалар жана насос станциялары курулуп, эски системалар кайра жаңыртылып жатат. Бул аракеттер биринчи кезекте дыйкандардын сугат сууга болгон жеткиликтүүлүгүн жогорулатууга, айыл чарба өндүрүшүнүн көлөмүн жана сапатын арттырууга багытталган.
Мындан сырткары, суу ресурстарын натыйжалуу пайдалануу, суунун жоготууларын азайтуу жана дыйкандардын маалыматтык сабаттуулугун жогорулатуу боюнча да үзгүлтүксүз аракеттер көрүлүүдө.
Натыйжада, ирригациялык системаларды жакшыртуу — өлкөнүн азык-түлүк коопсуздугун камсыз кылуу, айыл жериндеги элдин турмуш деңгээлин көтөрүү жана экономикалык туруктуулукту сактоо үчүн маанилүү кадамдардын бири болуп калууда.
